سوالف كاس الخليج ..

[عاشقة جميرا]

تحيه عشقية من الاميرة الحسناء الامبراطوره عاشقة ..

موضوعي هو :نقاش منوع حول كاس الخليج..
عطوني تعليقكم في كل ما يلي !

يعني خلونا نقولكم ..الامارات ..تم بالذيل !! الكل عنده نقطه الا نحن ....حتى اليمن !!

المنتخب اليمني !! وحارسهم المسدوح !! ما تمر دقيقه الا وانبطح !!!!!!!!! حقو مشكله ؟!

..الملعب و الارضيه التعبانه !!اشكرهم يغطونها بعد نهاية المباراة شو تغطون خرابه ؟!

الاخراج التعبان للمباريات !! احس انهم كاميرات جديمه ..وهنتين بس !!

يعني شو ممكن نقول ؟؟؟؟؟؟؟

الله يعين الى اخر الدوري الخليجي

عاشقة وتحيه !

 

[سواح]

مشكوره أختي عاشقة علي الموضوع ..

نعم كلهم عندهم نقطه الا منتخب الامارات ومنتخب السعودية ثلاث نقاط ..

وأن شاء الله نأخذ ثلاث نقاط من مباراتنا مع الكويت ..

وعن حراس المنتخب اليمني فأعتقد تكتيك لتأخير وضياع الوقت ..

نعم الارضيه واااايد تعبانه ملفت للنظر ومعقوله ما عندهم غير هذا الاستاد ؟؟

وعن الاخراج المخرج في وادي والمباراه بوادي ثاني وتصوير تعبان بالقو

أحس أني اشوف مباراه سنه 80 ؟؟

تحياتي


سواح

 

[شبيه الريح]

أولا اشكر عاشقة الجميرا على الموضوع ...

وحبيت أطلع الغيض الفيني شوي في هذا الموضوع :

منتخب الامارات أو بالأحرى منتخب الواسطات ...

منتخب يتحكم به المسؤولين الكبار.. والدليل .. لماذا لم ينظم الحارس العملاق محمد عبدالله للمنتخب ...

لاتقولون لي بسبب الإصابة ... بل لأن أحد المسؤولين الكبار لم يرد له أن يلعب في المنتخب ...

والسبب لربما البعض منكم يعرفه ... وهو عندما أراد نادي العين أن يقدم رشوة للحارس محمد عبدالله

لكي يسمح لهم بالتسجيل في مرمى فريقه ( نادي اتحاد كلباء ) ... والذي قوبل بالرفض لدى الحارس ...

... الذي اشتكى لدى رئيس النادي شيخ سعيد ...

وما خفي أعظم ...

فهل تريدون أن يحقق مثل هذا المنتخب الإنجازات !!!

 

[عاشقة جميرا]

والله يا سواح صدقت !! الي يشوف المباريات يحس انه في السبعينيات هب الثمانينات ..بس الي ناقص الكشيش ...!! لو كان لك لاعب مسوي كشه ..والله بتحس انك في السبعينات ..

الدوله كلها تعبانه !!المفروض هل الكويت مع احترامي يعتذرون ان استقبال مثل هل البطوله المهمه !!لان ما عندهم امكانيات !! لا ملعب مثل الناس !!معقوله ملعب واحد في دوله غنيه مثل الكويت !!.....حتى الحشيش متهايزين يزرعونه ! ....ولا عندهم امكانيات في النقل و الاخرا ج!!! ولا حتى فنادق ييلس فيها اللعيبه و الصحفيين !!

نرجع الى اخويه شبيه الريح ...
والله شو اقولك عن منتخبنا ..........غير انهم بيقشلونا ..يعني هم عمرهم فرحونا ..
حتى لو ايبون جول ..والنتيجه لصالحهم ..بتشوف قبل لا تخلص المباره بخمس دقايق الا وهم خسرانيين ..
..........يعني المنحوس منحوس .. احسن شي وصلوا له هو تصفيات كاس العالم ..ومن عقبها حلفوا ستين يمين ما يوصلون الى شي اعلى من هذا ..............

الله يعين لو لعبوا مع الكويت ..كمن جول بيكون في مرمانا !!
الله يستر

عشوقه

 

[ذياب]

السلام عليكم ورحمة الله وبركاته

مشكوره ياعاشقة جميرا على عرض هذا الموضوع

البدايه المنتخب الاماراتي ما قدم مستوى ويا مباراته ويا السعوديه مع الرأفه 2 / 0 وهم يقولو الحكم ظلمنا صح أنه ظلمكم لاكن المنتخب الاماراتي ما قدم أي مستوى والدليل أنه ظلمهم هو توقيف الحكم البحريني عن دوري الخليج 16 وحبيت أقول منتخب أغلبيته داشين بواسطه مستحيل ينجح

والمدرب يدخل لعيبه على كيفه يعني مايشوف شو الي ينقص الفريق وماشاله عليه يحط لعيبه مب في محلهم وشي بعض اللعيبه ما يبا يدخلهم نفس فيصل خليل ومحمد سرور ونواف

وسمحو لي وهذا رايي

 

[شبيه الريح]

اليوم راح يلعب المنتخب مع الكويت ...

الله يستر علينا بس ...

 

[عاشقة جميرا]

ذياب .....والله عاشقة لا تخالفك الرأي ..........كيف يتوقعون الكثير من فريق لا يملك مستوى ..ولا الي يقهر كلهم نفس الطول !! ........قصار ويوم لعبوا مع السعوديه ..استوى المنتخب الاماراتي منتخب الاقزام و السعوديه منتخب العمالقة ...
الصراحه ..لو بغيت رايي عن المدرب .......فهو ما يعرف كوعه من بوعه !! مع احترامي له ..بس مدرب انجليزي ..شو عرفه باللعب الخليجي او بالاحرى ..ما بيعرف يتعامل ..اشوف المدربين اللاتنيين احسن ..لان في تشابه بين كرتهم و كرتنا !! اقصد اسلوب اللعب ....
واعتقد ان التعبير خاني شوي يا ذياب ..لاني ما اقدر اتكلم وايد عن الكوره ...

شبيه الريح .. عشوقه بتعطيك شي تسويه ..يوم بتحيد وقت المباره بيبدء ..حط لك استكانت شاي ..قصر على التلفزون .. شغل الاذاعه على الاهداءات .. وخل الي يلعبون في حالهم و انته في حالك .....
ولا بيرتفع ضغطك ....... عاد كله ولا منتخب الكويت يوم بيلعب ولا في بلاده ........ بتشوف الغش على كيف كيفك ..

وسلامي
عشوقه

 

[شبيه الريح]

حسافة ... ودي أعمل بنصيحتج ...















بس ماعندي تلفزيون .. !!

 

[عاشقة جميرا]

خلاص عيل .. فكيت عمرك من الصدعه

 

[شبيه الريح]

اليوم راح نشوف الابيض ...

وترى هذه المباراة لا تحدد مصيره في البطولة فقط بل تحدد مصير

هذا الجيل ( محمد عمر .. فهد علي ......... الخ )


والمباراة بين ايديهم

وفريق الكويت مب ذاك الفريق اللي ينخاف منه .

تحياتي :

شبيه الريح