بقـَشةْ عِيَايـزْ ;`

غنَاتْيـے · 12 فبراير 2010

إجَازتي 13- 31 / 1 / 2010 . . [ 7 ] ;~

دَار التميمي حَمدْ . .
صبّو لها الشَاذليه ;~

واليُوم يُوم السعدْ . .
في ديرة أهل الحميّه !*

~> مُنى تحبها :h_negab:

«- . . السَلامْ عَليكمْ ورَحمة الله وبَركَاته . . -»
مساكمْ عافيه ورضا من رب العالمين :20:

يُوم الخميسْ 28 \ 1 \ 2010 - قطرْ . .
الصبح كنت متفقه مع ربيعاتي بنسير سوق واقف في جولة تصويريه . .

ومطرشات لي مسج في الليل إني لازم اييب هزاع و بطي . . :g_ouf:

ع الساعه 11 كنّا في سوق واقف (l)

يلسنا اول بادي في زيت وزعتر عسب نتريق ( ريوق متأخر ) . .

وشوفو هزاعي وحركاته مسوي بكس حق ربيعتيه الجازي . .
مايباها تصور :h_lala:

خلصنا ريوق وبدينا نتمشى وندخل في الدواعيس ونصوّر . .
كان الجو حلو حتى ولو شمس بس مش حارّه . .

وشوي شوي هزاعي وبطي خذو عليهم وبدو يسوون حركاتهم المعتاده ويسيخفون . .و ميميّا تصورهم . .

يربعون جدام . . ربيعتيه تقول لهم : انطرو . .
قال لها بطي : شو ننطر نحن ورقه . . قليل الأدب :h_kaak:

قالت امبيه غناتي انتو شنو تقولون . . ؟
خبرتها انه تقول له : إتريا :g_haa:

خلاف ودونا بقعه اول مره اشوفها . .
ماكنت ادري انه في صوب حق العصافير والحيوانات وانتو بكرامه . .
بطي وهزاع وايد استانسو عليهم . .

وهني هزاعي تم يركض ورا الحمام ويطيرهن . .
جنّه في الهايد بارك مب سوق واقف :h_love:

ولقطات اخرَى . .

وع الساعه 1 تقريباً ردينا الفندق . .

العصر كان جدونا انه انسير اللؤلؤه . . The pearl
ع اساس نتم فيها لين المسا . .
المكانْ يجننْ اللي يسير الدوحه لازم يروح . .

انا ماسرت ذ ووك اللي في دبي . .
بس اعتقد نفس الفكره تقريباً . . شي ثاني الصراحه . .

من داخل . . :giF93_g:

محلات راقيه موزعه مع كوفيات مجابله البحر واليخوت . .

لقطات من المكان . .
يجننْ صَح . . صيّح . . :h_eheehe:

ع المسا كانت درجة الحراره بين 9 والـ 10 . .
البرد مش طبيعي وانا مش متحمله الجو . .

الله رحمني شي هناك صيدلية . .
حدرت انا وسلطان . .

سلطان : عندك بخاخ مال الحساسيه والمخابي الأنفيه . . سخيف قصده جيوب :h_mynoon:
الصيدلاني جيه استوا شكله ( :h_yalahwy )
خلاف خذت حبوب وبخاخي اللي استخدمه دوم . .

ويا وقت العشا . . إهداء من قلب لـ مُنى :g_mest7ya

وايد تحب المطعم . .
وانا وهي خاطرنا نتعشى فيه . . الفرع اللي في جميرا . .

هذا المطعم من داخل . .
بس نحن يلسنا خاري ;

تعشينا وتمشينا :h_thumb:
وفي هالأجانب موجودين عدال المحلات من برع . .

يعزفون هرمونيكا وجيتار . .
واللي تغني او يسوي حركات بالنار . . وهجذا يعني . .

وللحديثْ بقيّه :h_bye:

غنَاتْيـے · 14 فبراير 2010

إجَازتي 13- 31 / 1 / 2010 . . [ 8 ] ;~

غربي هواكم ياهل الدوحه . .
خذني غصبْ شسوّي يَاربيّ ;~

عَاااشوووو . . :yola:

«- . . السَلامْ عَليكمْ ورَحمة الله وبَركَاته . . -»
صَباحكمْ تفاح أحمر . . :ax:

شكراً لكل المتابعين . . لاهنتو جميعاً (f)
يُوم الجمعه 30 \ 1 \ 2010 - قطرْ . .

الصبح ماكانت عندنا اي مشاوير عسب يوم الجمعه . .
إنتظرنا الشباب يردون من الصلاه وبعدها توجهنا للكورنيش . . :yaw:

وبالتحديد لـ مطعم بلهمبار . .

بطي يالس يجلّب المينيو ساعه كامله شرق وغرب . .
آخر شي قال ابى حمص :212:

لين مايخلص الغدا . . سرت انا والكايد نستكشف البقعه المحيطه بالمطعم . .

شكل المنظر من بعيد والشيرتون حلو :eh_s(1):
وهاي البناية اللي شكل مادري يمكن طلقه . . شكلها غريب . .

وزهب الغدا ~> حسستكم انها في البيت :Afkr:

عقب ماخلصنا . . كانت وجهتنا لـ الأسباير بارك + فيلاجيو . .

الحديقه وايد كبيره وحلوه . .
هايد بارك قطر :eh_s(6):

فيها بط وبحيره ونوافير . .

~> سلطان يعق سويس رول حق السمج في البحيره ع كيفه :h015:

وهني شوفو اللوحه . .

المزجم مايخطف . . لانه ممنوع العطس :h015:

وهزاعْ و بطي . .

قريت انه هالحديقه . . فيها من الأشجار النادره فـ العالم . .
وبالفعل . . شوفو شكل الشيره سبحان الله . . جنها مزهيره . .

فيها نافوره تجننْ . . :a050:
تخطفون من تحتها بس ماتتخيسون وايد ماي . .

بعدها سرنا فيلاجيو . . ( مول ) . . عدال الأسباير امرّه . .

هالمكان اول مره اشوفه . . يعني اظني من فتره بس فتحوه . .
لانه العام ماكان شي هالمحلات . . الماركات . . فندي وlv وبرادا وهالسوالف . .

وركبنا الجندوله . .

تمينا لين المسا في المول . .
وخلاف ردينا الفندق :bt:

غنَاتْيـے · 15 فبراير 2010

إجَازتي 13- 31 / 1 / 2010 . . [ 9 ] ;~

الله يا عمري قطرْ . .
وردة ونسماتج عطرْ ;~

إنتي في قِليبي حَبيبه !*
إنتي مِنْ رُوحي قريبه /`

«- . . السَلامْ عَليكمْ ورَحمة الله وبَركَاته . . -»
مساكمْ سعَاده . . ومَا السعَاده الا لـ أصحابها . . :ay:

مبروكْ فوزْ الوحده على الجزيره امس . .
ومَبروك ع الصَداره io:

♥ ,`

السبتْ / 31/ 1 / 2010 . .
آخر يوم في الإجازه :a050:

كنت مزهبه اغراضي وماشي مكان في شنطتي . .
فـ شويه عند خواتي وشويه عند الكايد بعد مذله :bad:

وعوني بدري . . ونزلت اتريق مع سلطان . .

خلصنا ريوق وسوينا جيك آوت . .
اختيه واخويه الثاني من 12 هم كانو خلاص في بوظبي . .

ونحن باقي وقت ع الطياره فـ قلنا بنسير سوق واقف . .

صح نسيت ارويكم اللوبي . .
واايد حلو :ah:

ومن بعدها إلى سوق واقف متجهوونْ . .

تصدقون ماذكر متى كانت طيارتنا . .

Back 2 uae :a040:

اللي ماكان في الحسبان . .
هزاع الحبيب يته أزمة الربو ونحن نازلين . .

اصلاً من ونحن في طريجنا لـ المطار وهو يتكلم بصعوبه ويكح . .
بس في مطار دبي . . بدى يتعب زياده . .
حطينا له الاكسجين في نص المطار . .

فـ طوفونا بسرعه من غير الإجارءات والخرابيط :Afkr:

بس الحمدلله من بعد الاكسجين استوى احسن . .
ونحن حاطين له حسيته يهاذي كـ عادته كان يغني ويخرف :eh_s(6):

كانت هاي فترة اجازتي . .
اتمنى اني ما ( ملّغت ) عليكم . . واستانستو معايه شرات ما انا استمتعت معاكم

من المواقف اللي مابنساها هناك :eh_s(6):

مره كنت راقده ع الساعه عشر واشوفهم يوعوني فجاه . .
يعني مال زياغ انا ماداني جيه احس حمامة فوادي اطير :cry:

واشم ريحة غريبه في الشقه . .
يقولون لي بسرعه نشي وشلي فارس وسيري شقة الشباب . .

لبسة شيلة صلاه ومن الروع ماعرف شو السالفه . .

ريحة شوط و الشقه كلها دخااان . .
ومسوين اخلاء لـ المكان :eh_s(6):

الله سلمّهم . . الغسالة وايرها مشوّط وناقعه . .
الحمدلله شافوه بدري ولا راحو فيها . . ~> والحبيبه في سابع نومه :Afkr:

فِمانْ الله :bt:

غنَاتْيـے · 18 فبراير 2010

ليه العِطرْ وانتي أنفَاسكْ دخُونْ ;~

تَرى للحينْ عِطركْ مَابرحْ صَدري ;~
. . . . إذَا ضميّيت ْ نفسي حيييييييييييلْ شميتَه !*

«- . . السَلامْ عَليكمْ ورَحمة الله وبَركَاته . . -»
مَساكمْ عِطرْ ونفاء . . :ax:

تشوفونْ هالصوره ..

انا وااايد واايد احب اسوي شعري جيه . .
عصق فرنسي . . ومرات ادلع ع ام بطي وتسوي لي شعري ايام الجمعه :$

آ آ آ آ . .

مِنْ زمانات وايدات ~> عربي زعيفْ . . :eh_s(6):
وانا ابى انزل لكم هالَرد . . بس دايماً العيازه تسيطرْ ع الوضعْ تمامْ . .

تَعالو برويكمْ شي في غرفتِي :ah:

هذا اصلاً كبت عشان يصفّون فيه DVD . . يناسب ثيم التسريحه مالتي . .
بس انا بـ أفكاري الجهنميه يعني سويته حق العطورْ . . :eh_s(6):

وعسب ما أزحمْ تسريحتي بعد خاصه وإنها صغيره . .
اشتريته من هوم سنتر . . وشي منه لون أسود بعد . .

وبشكِل اقربْ . . :eh_s(1):

طبعاً مستوي هالكبت سبيل اللي يخطف يتعطر منّه . .
خاصه الشباب حشا يسبحون بالعطرْ :bad:

نبدا مع بعض . .

من اليمين لين اليسَار . .

1 ;

اول عطر . .[ كحلْ ] . . واااااااااااايد احبه ( قلوووووبْ . . :m_love: ) . .
طبعاً انا من عشاق الدهنْ عود عسب جيه محبب قلبي . .

من باريس غاليري . . [ هند العُود ] قبل ماكان جيه شكله . .
كان اكبر واعتقد سعره جريب الـ 800 . . اللحينه استوى اصغر وسعره 595 . .

الصراحه عطر الأغنياء . . يغمضني اتعطر فيه بشكل يومي :h015:

2 ;

اللي عداله من نفس المكان ( هند العُود ) . .
اسمه [ ليلَك ] ريحته نسائية بحته . . يعني ريحته ورد الليلك . . تحس بإنوثه يوم تتعطر فيه :ah:
سعره 600 وشوي . .

3 ;

Bright Crystal من VERSACE . .
كنت استخدمه من زمان . . واول مانزل احيد خذته حق امايه وعيبها . .
اخواني يحبون الثاني العنابي . . انا افضّل هذا ريحته اهدا من كم شهر ياني هديه . .

4 ;

Boss من فتره وانا اشوف دعايته وهاذيج الهبله تترقص . .
فـ قطر شميته وخذته من السوق الحره . . عطر الشنطه حالياً . . ( يعني حاطتنه في الشنطه ) :eh_s(6):

:sheer:

1 ;

Juicy Couture . . بوفيونكه ورديه . .
هذا انتشر بشكل كبير . . وانا متأكده عشان شكله . .

io:

يعني حتى في البيت اللي ماشتراه لازم ياه هديّه . .
انا بعد كانو ماخذينه لي هديه . . ~> مال بلاش كثّر منه :^^:

من فتره مش طويله نزل ثاني بشكل غير حسيته احلى منّه . .

2 ;

drive me من escada وايد احب ريحته . .
اصلاً انا من عشاق عطور escada . . كل عطر ادمن عليه فتره . .

خاصه هذا كنت احبه من الأعماق . .

3 ;

zen من Shiseido . . وايد شفتهم يمدحونه في النتْ . .
وبالفعل يستاهل . . فرنسي مع شويه دهن عود . . ربااااااااااه ريحته طر :eh_s(6):

4 ;

Femme من boss . . يوم تاخذونه خذو معاه اللوشن ماله . .
يتم ع الجسم وايد . . ريحته بنوتيه . .

:sheer:

1 ;

Idole من Armani . .
هذا بعد كان هديه من ختيه في سفرة جنيف . . كان توّه نازل . .
وكنت استانس يوم اشوفه ع لوحات الإعلان في الشارع ~> يخرب بيت الغباء :eh_s(6):

2 ;

Diesel . . هذا من ذوق الكايد . .
هو يحبه ودوم يستخدمه شي منه الأبيض بس هذا ريحته احلى . .

3 ;

versace . . ماستخدمته وايد توّه يديد . .
بس الشور جيل ماله ريحته غااااااااااويه . . وتحس بريحة النظافه :eh_s(6):

4 ;

bvlgari . . هذا انا اسميه عطر الليل . .

io:
يعني ريحته وااايد هاديه واتعطر فيه قبل مارقد . . ~> ام الدويس . .
اصلاً مجرد انك تملك شي من bvlgari تحس انك شخص راقي صح !

:sheer:

1 ;

Miss Dior مازال يتصدر قائمة العطور اللي أحبها . .
وعمري ماسمعت حد الا ومدحه ويعيب الكل . . صدق ابدعو فيه Dior ومع الدخون :gooddw:

2 ;

Ricci Ricci . . من Nina Ricci حبيته اكثر عن عطر التفاحه الحمرا اللي قبله . . انتشر وايد . .
هذا ريحته بعد غاويه . . منعشه . .

:sheer:

بس شو تتريون بعد خلصنا . .
كل واحد ع بيته . .

فمانْ الله :bt:

تَدري وشْ ذِبحني يُومْ ضَميتهْ . . ؟
شَميتْ عطرٍ مِثلْ عطركْ على ثُوبه !*

غنَاتْيـے · 22 فبراير 2010

شكُراً منْ القلبْ . . . 3>

«- . . السَلامْ عَليكمْ ورَحمة الله وبَركَاته . . -»

مَساكمْ تميزْ وتألقْ وتفاؤلْ . . :ax:
يسعدْ لي أيامكم جميعاً . .

سَعيده جداً بـ أول خطوة اعلامية في حيَاتي . .
شعور بالنجاح . . وإحساس بالفخر تلقيته من الجميعْ . . :ah:

مكالمات - مسجاتْ - نظرات - ردود - وتقييماتْ . .

سويت المقابله بكل جرأه وثقه وبدون ترددْ . .
شي مايمس عاداتي وتقاليدي وارفع فيه راس قبيلتي ليش لا . . :122:

ألف شكر . . لكل من وقف بجانب سلامة الشحي خلال مشواري التصويري المتواضع . .
والشكر مراضيف لكل من هنئني بكلمه طيبه . . :bt:

سواء هنُا . .

http://www.alshohooh.ws/vb/showthread.php?t=82294

أو هنُا . .

http://www.alittihad.ae/details.php?id=9866&y=2010

كُلي أمل ان اكون عند حسن الظن دايماً . .
لاخليت ولاعدمت . . :a050:

[ :chek: ]

أمسْ في الدِوام وصلتي باقة جوري أحمر . .

كالعاده من الذوقْ كلّه مُنى \ ربي لايحرمني منج :ax:
كل سعاده بوجودج بقربي غيرْ . .

بس كَانت ع شكل بوكِيه . . مارمت أخليها في المكتبْ . .
شليتها البيتْ وحطيتها بـ هاي الطريقه . .

وأمس البناتْ في الدوام يابو لي Cupcake من sugar daddy's . .

[ :chek: ]

اليومْ كان الريوق ع شرفي . . عند بنات الـ it كالعاده . .
مسوين بلاليط وخمير . .

منو يباني اغرف له . . ؟

وبعدينْ شي احبه وااايدْ . .
شكراً اكبرْ شي في الدِنيا لـ أسومه . . لاعدمتج فديتج .. :ah:
استانست اليوم وايد معاكن . . وكلت كيك بمقدار اني احس ماقدر آكل يومين جدامْ . .

حد مايبى . . :^^:

[ :chek: ]

من القَلبْ بكل حب . .
باقات جوري أحمرْ لكمْ جميعاً . . :20:

غنَاتْيـے · 23 فبراير 2010

«- . . السَلامْ عَليكمْ ورَحمة الله وبَركَاته . . -»
صَباحكمْ فُل ويَاسمينْ :ax:

from 2 – 7 March 2010
انا وايد متحمسه . . اترياه من متى [ :a040: ]

طبعاً معرض الشارقه يكون أكبر . .
بس انا المره اللي طافت ماستوت عندي فرصه اسير ْ . .

لـ حد الآن ماعندي اي مجموعه محدده في بالي . .
بس ببدا أكتب القائمة اللي اباها واشوف شو اليديد :122:

الرواية الوحيده اللي ادور عنها في كل مكان . .
كانت عندي نسخة يتيمه واختفت في ظروف غامضه . .

هي ( عينَاكِ يا حَمده ) . .
قرأتها أكثر من مرّه . . واتمنى ارد احصل نسخه يديده . .

اي حد عنده كتاب او روايه ينصحني فيها اتمنى انه مايبخل عليّه . .
وخاصه ادور كتاب يكون محتواه عن حياة وقصص الرسول صلى الله عليّه وسلمْ . .

الموقع الرسمي لـ المعرضْ . .

http://www.adbookfair.com/cms/

وعسى يومكم خير وبركه :ah:

غنَاتْيـے · 24 فبراير 2010

[align=right]

بُوظَبي تِشتَاقْ ضمّتكمْ ;~
. . يَاحبايبْ مِن سَكنْ فيها !*

مِن يعَوضْ يالضَنا عَنكمْ \`
وإنتُو بَدرٍ في لَياليها . .

«- . . السَلامْ عَليكمْ ورَحمة الله وبَركَاته . . -»
مساكمْ سُكّر زياده . . :m_ydakhen

[ :20: ]

بمناسبة الحديثْ عن معرض الكِتابْ . .
خبرني استاذي بوحمده عن كتاب ( الرحيق المختوم ) وكذلك الدكتور 【 فارس 】 خبرني عن نفس الكتاب . .

اسم المؤلف. صفي الرحمن المباركفوري . .
سويت بحث وقريت عنّه وشرات ماقال الدكتور حسيته سلس وسهل ومتحمسه انه يكون عندي . .

واخويه الجارح 2003 خبرني عن ( كتاب السيرة النبوية لابن هشام )
شكراً لكم جميعاً ماقصرتو

شو اللي شجعني اكثر اني اطلب مثل هالكتاب . .
بديت قبل أمس بقراية كتاب ( إستمتع بحياتك ) لـ محمد العريفي . . :m_mest7y:

قريت خلال الصفحات مواقف وقصص عن الرسول صلى الله عليه وسلم . .
وكيف كان يعامل الناس والأطفال والنساء والحيوانات وانتو بكرامه . .

والله قصص ينشرح لها القلب وتم تقراها 3 و 4 مرات . .
واضايجت من نفسي ليش انا من قبل ماعرف هالقصص . .
شوفو كيف حياتنا وكيف عايشينها وغافلين عن اشيا كثيره وكيف حياة سيد الخلق عليه افضل الصلاة والسلام ..

الكتاب اكثر من رائع . .
بخلصه اذا ربي راد وبحط لكم عنه . .

[ :20: ]

تعرفون هالحلاوه . . :m_love:

قبل كانو يبيعونها في الجمعيات . .
ومن كم سنه خلاف انقطعت عن الأسواق . . وتميت ادورها لين قلت بس . . :m_dam3ah:

يوم راجعين من قطر شفتها في السوق الحره مالهم . .
وماصدقت خذت لي وايد . . ولـ الأسف مستويه آكل شوكليت بمعدل غير طبيعي ابداً . .:m_z3lan:

خذت منها حق الـ HR وكنت اسولف اقول لهم اللي بيسافر يدور منها في السوق الحره . .
وبالفعل . . في شخص امسات رد ياب لي ومن قطر بعد . .

OMG تخيلو احطها جدامي وعادي جنّي يالسه آكل حب ولا فرّاخْ . . :m_haha:
وحده ورا الثانيه . .

وقالو لي شي منها في ابيلا . .
وسرت دورت اليوم ماحصلت . .

~> إدماااانْ . .

[ :20: ]

اليوم بنات الـ IT طايح في خاطرهم براتا وكيما . .:m_9admah:
الله يغربل العدو . . وسارو طلبو من مطعم ناصر . . طبعاً هذا مشهور عندنا في بوظبي . . :m_m7tar:

حدرت عندهم القسم أشم الريحه شاله البقعه . . عاد الطفاسه تميت اهاوع :m_haha:
ريحة بصصصصصصصصصصصصصصصل :m_ma9dom:

أنا ما آكل كيما . . فـ مسوين لي براتا وجبن . . :m_haha:
قلت لهم جان خبرتوه يسوي لنا دلة كرك بعد . . كممممممممممملتْ . .

[ :20: ]

وبعد الدوام . . غداء هادئ مجابل البحر . .

3>

دِيرتي ومِخلفْ الجدّي . .
غَاليه عندي ومَحبُوبه ;~

. . لَو عطُوني الهِندْ والسندّي . .
والبحرْ لمحيطْ زَادُو به !*

لاحَشا والله مَابدّي . .
قِلتْ قُولٍ مَابه كذُوبه \` [/align]

غنَاتْيـے · 27 فبراير 2010

مَبروكْ عَليكمْ الحِيا 3>

[align=right]
يِعلْ يَسقِي بالحِيا دَارْ مَحبُوبْ القلوبْ . .
لِي وِدَاده في الحِشَا مَارضينَا نبدّله !*

[ :yola: ]

«- . . السَلامْ عَليكمْ ورَحمة الله وبَركَاته . . -»
مَساكمْ برق ورعدْ ورحمه يارب :yaw:

ياااهْ إشكثرْ انا مستانسه بالمطرْ . .
استغليتْ انه ابويه سار المسيد ووقفت في الحوي ع كيفي لانه لو شافني بنقصب ان شاءلله :eh_s(6):

الله يجعلها سُقيا خير وبَركه . .

:yaw:

أمسْ سِرنا DXB . .
كانت الوجهه الرئيسيه لـ جميرا وتحديداً مطعم ( برج الحمامْ ) . .

بس قبلها خطفنا دبي مول عن خاطريه . .
خاصه وانه انا ولا مره حادرتنه وابى اشوفه لانه الناس كلها تمدحه . . ( ماتستهويني المولات ) . .

ماطولّنا وايد . .
ودايماً انا والكايد نحبْ ندلّع اعمارنا . .

يلسنَا في آرمني كافيه :ah:

خلاف حدرتْ candylicious . . المكان يصيّح . . :a050:
بس لـ الأسف ممنوع التصويرْ . .

وايد حلو وماكان خاطريّه اظهر من المحل :eh_s(1):
ولقّطت شوية خربطان حق الفروخ . . وخذت لي mug . . وايد cute . .

تمشينا شويه . .
وخذت لي كِتب يديده . . :yaw:

طبعاً الشفق وقمر جديد . .
يمكن اغلبيتكم يعرف انه هالكتب لـ قصة أفلام twilight و new moon . .

للروائية ستيفاني ماير . .
الرواية باقي منها جزئين اعتقد يقولون انه الكتب كلها نزلت بس في السينما 2 . .

ورواية The sand fish لـ الكاتبة مها قرقاش . .

:yaw:

بعدها إلى جميَرا متجهُونْ . .
واحلى غدى في ( برجْ الحَمامْ )

يِعلْ دَاركْ منِ هطلْ وبلْ الغيُومْ . .
يرظفْ الوَسمي عَليها كِل عامْ !*[/align]

غنَاتْيـے · 3 مارس 2010

[align=right]

مَاقُولْ عوّد أنا مِحتاجكْ !*
. . شِف حَالتي والعُوقْ هبْ متغبّي /`

أمرَاضْ وأعرَاضْ اتريَا علاجكْ ;~
ويشهدْ على قُولي ملفي الطبّي . .

«- . . السَلامْ عَليكمْ ورَحمة الله وبَركَاته . . -»
اشحالكمْ عساكم بخيرْ . . ?

شكراً لكل المتابعين لـ صفحات غناتي . . :00100:

[ :20: ]

مَبروك عليكم الرحمه مجدداً . .
مَاشاءلله أمس المطر صبيب . . وإحصائيات الأمطار في العاصمه فاقت الشماليه :yaw:

[mark=#FFFF00]إمرؤ القيسْ[/mark] هذا شارع الكورنيش . .
الزعفرانه صوب المرور . . :eh_s(6):

بدا المطر من 2 ونص . .
الصبح كان نفاف ونحن فـ دربنا للدوام . .

بس بعدين ماشاءلله صبيييب . .
وبدا الخبال :yaw:

أمس اصلاً كان عندنا وايد شغل . .
بس ماتحصلون حد ع مكتبه الكل مستانس بالنعمه . . الحمدلله

[ :20: ]

سرت معرض الكتاب :a040:
زهبت قائمة الكتب اللي اباهن من أمس . . ورحت اليوم الصبح . .
كان شوي زحمه عسب عيال المدارس :212:

في أقسام لازم كل سنه ازورها . .
ومن اهمها نادي تراث الإمارات . . لانهم ينزلون دواوين عن شعرا الإمارات الجدامى . .

هالمره خذت عنهم ديوان بن مترف الله يرحمه . .
( خليفه بن مترف الجابري )

وخذت ديوان بن زعل . .
مادري اذا الكل يعرفه او لا . . بس شخصية معروفه وانا وايد احب سوالفه . .
نوخذه وطواش الشاعر خميس راشد بن زعل الرميثي ( بو راشد ) واشتهر بسوالفه وخفّة دمه . .

وااايد استانست لاني شفته هناك . .
تقدرون ادورون سوالفه في النت . .

سلمت عليه وقلت له ابويه اباك توقع ع ديوانك انا شتريته . .
قال انا توقيعي اسمي !

قلت له انزين يابويه مش مشكله وتم يضحك معايه . .
يجنن . . كنت ابى ايلس اتصوخ سوالفه بس مارمت شي رياييل . .

خلاف شفت الإستاذ علي بو الريش . .
انا كنت ماخذه العام روايته ( الغرفة رقم 357 ) . . فـ ربيعتيه اشترتها ووقع لها عليها . .

[ :20: ]

في كورنر اول مره اشوفه اسمه شاركونا الحلم . .
قصص أطفال من إبداعات أنجال :

خليفه بن محمد بن خالد آل نهيان . .
خذت حق ميره وبطي . .

[ :20: ]

حصيلة الكتب اللي اشتريتها . .

مكتبتي المتواضعه . .

بس السؤال اللي يطرح نفسه . .
وين بحط الكتب اليديده ماشي مكاااان :eh_s(6):

[ :20: ]

وإنْ قِلتْ لكْ : عطني يديِنكْ ودّي أشرَبها . .
خِذني عَلى قّدْ عَقلي \ وإسكبْ إيدينكْ !* [/align]

غنَاتْيـے · 27 مارس 2010

يَاهَادي الضَالْ ويَامنْ ردْ يُوسفْ إلى يَعقوبْ ردْ عَلينا ضالتنَا . .
اللهمْ آمينْ . .
اللهمْ آمينْ . .
اللهمْ آمينْ . .

السَلامْ عليكمْ ورحمة الله وبَركاته . . :wrd:
اشحَالكمْ عساكمْ بخيرْ . . ؟

عوده بعدْ غيابْ طويلْ نوعاً ما :==:
وردْ ع السريعْ عشانْ خاطرْ اللي طلبو منّي ابديتْ . .

تصدقون انه قبلْ امسْ تاريخ 25 \ 3 . .
كملت سِنه من كسرتْ رُيولي . .
يالله كيف الأيامْ يخطفنْ بسرعَه . .

لينْ اليومْ ريوليِ بَعدها تعَورني . .
وكِلْ مره اقول بسير اسوي علاجْ طبيعي وأتعَايزْ . . :ha:

اذا امشي مَسافاتْ طِويله . .
والبسْ كَعبْ مثلاً 3 ايامْ ورى بعضْ مارقدْ الليلْ من الألمْ . .

تجِربه مابنسَاها . . والحِمدْ لله عَليها . .
وكيفْ مرّن الثلاثْ شهورْ وانا مجَبسه . . ايامْ ثقيله ع قَلبي . .

الإسبوعْ اللي طَافْ . .
كنّت مع هَزاعْ وبطيْ ومن الفَضاوّه سويِنا جَلسةْ تصويرْ سَريعة . .

[ مَاشاءالله ]

وأخيراً شفتْ new moon :sheer:
قبلْ امسْ سِرتْ اشتريته ;

ليشْ الكلْ طايح فيه تمديحْ . .
هُو حلو بسْ مش شَراتْ الجزء الأولْ . . :bad:

انا خذت اجزاء الكتبْ كامله اللي هنْ 4 . .
بس ماقريتْ ولا واحد فيهن بعدني . . وماشاءلله الكايد خلصهن ويقول انه الروايات كِذا :gooddw:

بس سخيفْ يالسْ ويخربْ عليه . .
ويقول اخبرج شو بيستوي في الجزء اللي عقبه :cm:

الكلْ كان يسألني عن الكتبْ اللي خذتهنْ . .
لـ الأمانه انا مابديتْ في أي كِتاب . . ابى اخلص اللي في ايدي وخلافْ ببدا اقرا . .

دومْ ادور bookmark حلو حق الكتب بس ماحصلْ . .
مرّه خذت من The One اللي ع اليمينْ . .

واليسارْ تخبلتْ عليه خذته من سوقْ واقفْ - قطرْ (

)
بس من فتره يتني هديه من ربيعتيه . .

ومن بين الأغراضْ bookmark وايدْ cute . . :ah:
تدرونْ انه اختها اللي مِستونها . . ؟

كِلها Hand made . . حلوات . . اهمْ شَي الناقه (

)
ماشاءلله عليها اختها مبدعهْ وجريبْ بتبدا تجارتها الخاَصه وأنَا اولّ وحده بسوي لها دَعايا تِستاهلْ . .:a040:

ومش بس هاذيلا . . تسوي cards . .
وسوّت لي مجموعَه راقَيه . .

لاَ إله إلاَ أنتْ سُبحَانكْ إني كُنتْ مِنْ الظَالمينْ . .

بقـَشةْ عِيَايـزْ ;`

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

غنَاتْيـے

مُصورَه فُوتُوغرَافيه ♥

نحن نقدر خصوصيتك